Թուրքիան ու թրքամետ գրոհայինները զինված հարձակումներ են իրականացրել Արցախում քրիստոնյաների դեմ

315

Աֆրիկայում և Մերձավոր Արևելքում քրիստոնյաների և այլ կրոնական փոքրամասնությունների շահերի պաշտպանությամբ զբաղվող «Ի պաշտպանություն

քրիստոնյաների» (IDC) առաջատար իրավապաշտպան կազմակերպությունը ԱՄՆ Կոնգրեսի անդամներին կոչ է արել հրաժարվել ԱՄՆ-Թուրքիա հանձնախմբի անդամությունից: Իրավապաշտպան կազմակերպությունը նաև նորընտիր պաշտոնյաներին կոչ է արել չընդունել խմբին միանալու առաջարկը:

IDC-ի հայտարարության մեջ ասվում է. «2020-ին ականատես ենք եղել Թուրքիայի և այդ երկրի նախագահ Ռեջեփ Էրդողանի կողմից ԱՄՆ-ի և Մերձավոր Արևելքի երկրների քրիստոնյաների դեմ ուղղված թշնամական քաղաքականությանը:

Դեկտեմբերին Թուրքիայի նկատմամբ պատժամիջոցներ են կիրառվել ռուսական S-400 զենիթահրթիռային համակարգեր գնելու համար: Թուրքիան ու թրքամետ գրոհայինները զինված հարձակումներ են իրականացրել Արցախում, Իրաքում և Սիրիայում պատմական քրիստոնեական համայնքների դեմ»:

Ըստ կառույցի՝ Էրդողանը նաև պահանջել է ջնջել քրիստոնեական պատմական վայրերն Անատոլիայում՝ քրիստոնեության երբեմնի ամենամեծ՝ Սուրբ Սոֆիայի տաճարը և Խորա եկեղեցին վերածելով մզկիթների:

«Թուրքիայի անխոհեմ արտաքին քաղաքականությունը չի համապատասխանում արևելյան միջերկրածովյան շրջանում ԱՄՆ-ի շահերին: Քրիստոնյաների դեմ բացահայտ հետապնդումներն այլևս չպետք է անտեսվեն:

Ժամանակն է, որ մեր նորընտիր ղեկավարներն անվրեպ ուղերձ հղեն Թուրքիայի դեսպանությանը, որ թույլ չեն տա օգտագործել իրենց անուններն ու պրոֆեսիոնալ իմիջը Էրդողանի անխոհեմ ղեկավարումը խթանելու համար»,- հայտարարել է կազմակերպության նախագահ Թոֆիք Բաակլինին: