Սիրիայի տապալված նախագահ նախագահ Բաշար ալ-Ասադը երկիրը լքելիս Սիրիայում գտնվող ռազմական թիրախների կոորդինատները փոխանցել է Իսրայելին։ Այս մասին հայտնում է թուրքական իշխանամետ «Hürriyet» պարբերականի սյունակագիր Աբդուլքադիր Սելվին։
Թուրք սյունակագիրը հայտնել է, որ այս տեղեկությունն իրեն է փոխանցել իր «հավաստի աղբյուր»-ը։ Նրա պնդմամբ՝ Ասադն Իսրայելին ցուցակ է փոխանցել՝ նշելով զենքի պահեստների, հրթիռային կայանների և ռազմական ինքնաթիռների գտնվելու վայրը, ինչի դիմաց այդ երկրից երաշխիքներ է ստացել, որ փախուստի ժամանակ իր օդանավին չեն հարվածի։
Սելվին ուշադրություն է հրավիրել այն բանին, որ Ասադի հեռանալուց հետո Սիրիայում գտնվող թիրախների վրա իսրայելական կողմից իրագործված հարվածների ֆոնին իր աղբյուրի տրամադրած այս տեղեկատվությունը ակնհայտ կեղծիք չի թվում։
Թուրքական իշխանամետ պարբերականի սյունակագիրը հայտնել է նաև, որ Սիրիայից Ասադի հեռանալու մասին որոշ այլ մանրամասներ էլ ունի, հատկապես Իսրայելի դերի հետ կապված։ Նա խոստացել է, որ այդ մանրամասները կբացահայտի ժամանակի ընթացքում։
Ասադի գրասենյակը դեռևս այս տեղեկատվությունը չի մեկնաբանել։
Հիշեցնենք, որ նոյեմբերի վերջին Թուրքիայի աջակցությունը վայելող զինյալ ընդդիմադիրները, խախտելով 2020 թվականի մարտից հաստատված հրադադարը, լայնածավալ հարձակում են սկսել սիրիական բանակի դիրքերի դեմ ու մեկը մյուսի հետևից գրավել երկրի խոշորագույն քաղաքները, այդ թվում Հալեպը, Համան և Հոմսը։ Դեկտեմբերի 8-ին վերջիններս մուտք գործեցին մայրաքաղաք Դամասկոս, ինչից հետո կառավարական ստորաբաժանումները լքեցին քաղաքը։ Բաշար ալ-Ասադը հրաժարական տվեց Սիրիայի նախագահի պաշտոնից և լքեց երկիրը։
Սիրիայում քաղաքացիական պատերազմը շարունակվում էր ավելի քան 13 տարի։
