Oragir.News-ը ներկայացնում է նոր հաղորդաշար՝ «Մեր գյուղը», որի շրջանակներում այցելելու ենք Հայաստանի տարբեր գյուղեր և քաղաքներ՝ ներկայացնելու այնտեղ ապրող մարդկանց առօրյան, գյուղի պատմությունը, ավանդույթները։
Մեր առաջին կանգառը Արմավիրի մարզի Բաղրամյան խոշորացված համայնքի Երվանդաշատ գյուղն է, որը գտնվում է հայ-թուրքական սահմանին։
Մոտ 750 բնակիչ ունեցող գյուղում հիմնականում զբաղվում են այգեգործությամբ և անասնապահությամբ։
Բաղրամյանի փոխհամայքնապետ Հովնան Ավետիսյանը, որ ծնվել և ապրում է Երվանդաշատում, հպարտությամբ նշեց՝ իրենց գյուղը գտնվում է Հայաստանի 3-րդ մայրաքաղաքի տարածքում․
«Այստեղ գտնվում է Երվանդ թագավորի արքունիքը, պեղումներ են կատարվել, պատերը երևում են։ Գյուղը շատ հիասքանչ վայրում է գտնվում, մեր երվանդաշատցիները շատ հյուրընկալ, շատ լավ, աշխատասեր ժողովուրդ են։ Գյուղում գրեթե ոչ մի խնդիր չկա, միայն գազի հարցն է, դա էլ շուտով կլուծվի, որովհետև ծրագիրն արդեն հաստատվել է Կառավարության կողմից»։
Հովնան Ավետիսյանը նաև նշեց, որ իրենց համար շատ կարևոր էր նաև գյուղում եկեղեցի ունենալը, որի բացումն այս տարի է եղել։
Երվանդաշատի վարչական ղեկավար Շահեն Մուրադյանն էլ ասաց, որ գյուղում տարբեր մրգեր են աճում, բայց առաջին տեղում ծիրանն է․
«Միայն այս տարի 1100 տոննայից ավելի ծիրան է դուրս եկել այս պուճուր գյուղից»։
Գյուղում եղանք նաև Զավեն Գևորգյանի դարբնոցում։ Ասաց՝ հիմնականում հողագործական գործիքներ է պատրաստում․
«Փոքր տարիքից այստեղ եմ եղել, հորս հետ զբաղվել եմ այս գործով։ Շատ հին դարբնոց է՝ 70-80 տարեկան, ոչ մի փոփոխություն չենք արել։ Ես լսել եմ, որ դատարկ զնդանին չի կարելի խփել, մեկ էլ զնդանի վրա նստել չի կարելի, քանի որ այն հաց աշխատելու համար է»։
