MTS Urent Power Banks ծառայության տեխնիկական տնօրեն Իլյա Կազակովը RT-ի հետ զրույցում ասել է, թե որոնք են այն հավելվածները, որոնք ամենից շատն են սպառում սմարթֆոնի մարտկոցի էներգիան։ Ըստ նրա՝ պետք է հասկանալ, թե որ հավելվածներն են «ուտում» լիցքը և ինչպես վարվել դրանց հետ։
Դրանց թվում Կազակովը նշել է սոցիալական ցանցերի հավելվածները, որոնք անընդհատ աշխատում են հետին պլանում՝ ներբեռնելով բովանդակություն և ծանուցումներ ուղարկելով։ Նա խորհուրդ է տալիս անջատել ֆոնային թարմացումներն ու ծանուցումները։
Ցանկում ներառված են նաև GPS նավիգացիոն հավելվածները, որոնք ֆոնային գործընթացներ են իրականացնում՝ քարտեզները և երթևեկության տվյալները թարմացնելու համար: Բացի դրանից՝ Կազակովը խոսել է կարճ տեսանյութերի ստեղծման հավելվածների մասին, որոնք պահանջում են տվյալների մշտական բեռնում և մշակում։
Փորձագետը նաև հիշեցրել է հայտնի վիդեո հարթակները, որտեղ հոսքային տեսանյութերի նվագարկումը, հատկապես բարձր որակով, օգտագործում է մեծ ծավալի հաշվողական հզորություն և մարտկոցի էներգիան: Նա խորհուրդ է տալիս իջեցնել տեսանյութի որակը և չօգտագործել սմարթֆոնը որպես գրպանի հեռուստացույց։
Կազակովը նշել է նաև տեսակոնֆերանսների հավելվածները, որոնք տեսախցիկի, խոսափողի և տվյալների փոխանցման մշտական օգտագործման պատճառով շատ էներգիա են սպառում։ Նա խորհուրդ է տալիս նվազեցնել էկրանի պայծառությունը, հնարավորության դեպքում օգտագործել միայն ձայնային ռեժիմով զանգերը, իսկ հավելվածներն օգտագործելուց հետո փակել դրանք։
Վերջապես, ժամանակակից խաղերը, որոնք գրեթե ամենաշատն են բեռնում սմարթֆոնի պրոցեսորը և գրաֆիկական ենթահամակարգը, նույնպես շատ էներգիա են սպառում։ Այս դեպքում Կազակովը խորհուրդ է տալիս խաղի ընթացքում նվազեցնել էկրանի պայծառությունը։
Փորձագետն ընդգծում է, որ առհասարակ կարևոր է հասկանալ, թե որ հավելվածներն են մարտկոցի էներգիան սպառում և միջոցներ ձեռնարկել այն խնայելու համար։
